Kuhasa - The fog

Aur fir oas barasane lagi...

Kabhi madham to kabhi tej
Kabhi kaanch ko dhundhlati hui, to kabhi patto pe ithlati hui...

Kankanpati, kiskisati thand ke sath milkar anokhe adwitiya prayog krne me lagi hui thi ...

Adna sa mai office ke ek kone me baithe saamne pade pardo ki daracho se anayas hi sab dekh raha tha...
Reh reh kar zehen me us oas ko apni muthhi me kas lene ki icchha jeevant ho rahi thi...

Soch raha tha kitni nithur aur kitni apardarshi hai ye chhoti chhoti bunde...
Fir bhi inki swacchand aur shwet vichardhara baar baar mujhe apni taraf akarshit kiye ja rahi thi...

Mai yaha baitha baitha, vaha pahuch hi gaya tha,
us ghane kohre me kho jaane, thanth me kankanpate hue pedo se milne,
patto pe padi oas ki boodo ko peene,
kohre ko cheer cheer kar sooraj ki kuchh kirano ko talaashne...

Aisa lag raha tha mano mai aur prakrati ab ek ho rahe hain,
nashwar sharir ka abhas ekdm samapt ho chala tha,
maano yehi to hai jiski talash me mai varsho se bhatak raha tha...

Adbhud, alaukik, apratim si anubhitiyan ho rahi thi...
Gravity kahi door padi karah rahi thi, aur kitkat n lollipop mithya ho chuke the...

Prabhat, usha aur sandhya ka andaja lagana mushkil ho raha tha,
Khitij, asmaan aur zameen sab apni paridhi aur seema laanghkar ek ho chuke the...

Sab kuchh shant tha, ekdm sannata,  shunya me roshni aur andhere me fark karna mushkil ho raha tha aur ....
Vigyan aur takneeki se pare, pariyo ki kahaniyo ki bhanti, mai kalpana ki udan me kulache maare ja raha tha ki ...

Tabhi ek ajeeb si awaz ne mujhe jhakjhora  "Vivek, delivery taiyar hai na"...
Aur mai apni anandmayi kalpana se bahar nikalkar, vapas se us ayatakar yantra ke saamne sar peetne laga !