Rakhu kahan, sambhalun kaise,
Koi sandook ya kisi deewan me sama jaayein,
Itni chhoti to kabhi nahi rahin ...
Aur us pe bhi
Waqt dar waqt inka badhta hua qad,
Aur pata bhi nahi kya hai inki hadd...
Socha kai baar ab inse chhutkara pa leta hu
Prayas krta hu aur door kahin kho aata hu...
Ek raat unhe andhere me kho aaya tha,
Hui subah to jharokhe pe khada paya fir...
Bistar ke neeche bhi tha chhupaya,
Raat ke teesre peher me hi sirhane pada paya...
Tej raftaar chalti train se raste me hi fenk aaya tha,
Fir se kuchh hi dino baad unhe dehleej pe rengte hue paya...
December ki kadkadati thand me thithurte hue chhod aya tha,
Agli sham hi to sigdi me hath sekte paya ...
Laal aag ki lapto me bhi tha jalaya,
Aayi musladhar barsaat to tej dhar me baha aaya tha,
Sardiyo ke sheele kapkapaate kohre me bhi ghumaya,
Aayi thi garmiya to may ki tapti dopahari dhoop me rakh aaya tha ...
Ghane jungle me le jakar, rasta bhula aaya tha,
Ayi holi to kaale rang se leep pot aya tha,
Ayi diwali to rocket ke sath bhi udaya...
Tanhai se uthakar dhol nagadon ke shor me bhula aaya tha,
Sote hue sapne ke andar sapne ki teesri teh me chhupa aaya tha,
Aur sab koshishein bhi to bekar rahi thi unhe dafnaane ki ...
----------------------------------xxxxxxxxxxxxxxxxx-------------------------------
Aaj fir se ki koshish unhe mitane ki,
Apni bebaak hansi se unhe dabaane ki ...
Jaane kaisa fir dard utha,
Jaise dil me koi teer chubha...
Ab to kosis bhi nahi kr pata unhe mitane ki,
Rakh ke sirhaane unhe ajkal so jata hu,
Kabhi haste haste yunhi ro jata hu...
Kabhi takiye to kabhi chadar se lipat jata hu,
Fir se waqt ke us haseen safar me kho jata hu ...
Ab to bas paa hi liya jo bhi mujhe pana tha,
Inhe mitane ka prayas to bas bahana tha ...
Ab na hum aur milege,inko badhane ke liye,
Jitni hain utne me ek zindagi jee jaaunva,
Ab unhe sath hi rakhunga na mitaunga ...
karunga hifazat, andhi tufan bhi ayege to,
Leke inhe kisi chattan se chhup jaaunga,
Ab kuch bhi ho,unko na kabhi mitaunga,
Jab tak mai jiunga unko bhi jilaunga,
Aur mar bhi gaya to apne sath leke jaaunga....
Teri Yaadein, haan Teri Beshumaar Yaadein !!!.........
November 2013, Random Feelings
